客途秋恨 Sorrows On An Autumn Trip

客途秋恨 Sorrows On An Autumn Trip歌词
客途秋恨 Sorrows On An Autumn Trip歌词
客途秋恨 白駒榮主唱
(南音) 涼風有信.秋月無邊.
虧我思嬌情緒,好比度日如年.
小生繆姓乃係蓮仙字,為憶多情啫叫做麥氏秋娟.
見佢聲色與共性情人讚羡呀,
佢更兼才貌的確兩雙全.
今日天隔一方呀..難見面,
是以孤舟沉寂晚景涼天.
唉..你睇斜陽照住個對雙飛燕呀,
虧我獨倚蓬窗我思悄然.
耳畔聽得秋聲桐葉落,
又只見平橋衰柳鎖寒煙.
第一觸景更添呀..情懊惱呀,
虧我懷人愁對囉個個月華圓.
正係舊約難如潮有信呢,
新愁深似海無邊.
虧我情緒悲秋同宋玉呀,
況且在客途抱恨你話對乜誰言？
記得青樓邂逅個晚中秋夜,
我共你並肩攜手拜月嬋娟.
我亦記不盡許多情與義囉,
真正纏綿相愛又復相憐.
共你肝膽情投將有兩個月,
唔想同羣催趲要整歸鞭.
共你幾囘眷戀總係難分捨呀,
真係緣慳兩字拆散離鸞.
正係淚灑西風紅荳樹,情牽古道白榆天,
共我杯酒臨歧同我餞別呀,
在望江樓上設離筵,
你仲牽衣致囑我個段衷情話呢,
叫我要存終始總要兩心堅.
今日言尤在耳成虛負呀,
屈指如今又隔一年.
近日聽得羽書馳諜報,
仲話干戈撩亂擾亂江村,
個啲崐山玉石也遭焚毀呀,
好似避秦男女入桃源.
你係幽蘭不肯受泥污染,
又怕賊兵來犯月中仙.
你話嬌花若被狂風損,
一定玉容無主倩乜誰憐.
個陣輾轉馬前遭血濺,
日落呀魂歸玉化煙.
你話若然艷質遭兇暴囉,
我寧願同埋白骨去伴姐妝前,
或者死後得成連理樹,
好過生時常在呀呢個奈何天.
但望慈航法力總要行方便呀,
就把楊枝甘露救出了火坑蓮.
等你劫難逢凶俱化吉,
個啲災星魔障兩不相牽.
虧我心似轆轤千百轉,
空眷戀囉,嬌呀但得你平安願呀,
我就任得你天邊呀..
明月都照向別人圓.
(轉乙反線)
聞擊析囉,鼓三更呀,祇見江楓呀..漁火照住我愁人,幾度呀..徘徊思往事呀,我勸嬌呀..唔好咁癡心呀.風塵不少憐香客,羅綺還多惜玉人.你話煙花呢誰不貪豪富,做乜你偏把多情向住小生呀,況且我窮途作客囊如洗,擲錦纏頭愧未能.記得填詞偶寫個段胭脂井,含情相伴你對著盞銀燈呀..你細問我曲中何故事,我把陳後主個段風流講過你聞.講到兵困景陽家國破,歌殘玉樹後庭春呀..
(抛舟腔)
攜著二妃.. 攜著二妃藏井底,死生難捨, 難捨.. 難捨佢嘅意中人…聞聽此言你多嘆息囉,仲話風流天子更重情真.
(轉正線)
但係唔該享盡奢華福囉,就把錦繡河山委路塵.你係女流也曉個啲興亡恨,不枉梅花為骨雪為心.仲話我珠璣滿腹實在原無價,我知你憐才情重更不嫌貧.想到此情欲把嫦娥問,無奈楓林見得月色昏.遠望樓台人影近,人影近囉,莫非相逢呢一位月下魂.